صورك أمانة،
سلّمها بمعرض ما يفتحه غير زبونك.
KAPTORI يحمي شغلك من لحظة التسليم: رمز خاص، حد للأجهزة، سجل لكل دخول، وعلامة مائية ما تنشال إلا من يوصلك المبلغ.
- الزبون بدون تطبيق ولا حساب
- الرمز يوصل على الواتساب
- صور وفيديو بجودة عالية
- الضيوف يلاقون صورهم بالسيلفي
التسليم الحالي ما يحمي أحد
تعبت على الجلسة أيام، وبالآخر تسلّمها برابط عام أو على الواتساب.
الجودة تروح
الواتساب والتليغرام يضغطون الصور، والزبون يشوف شغلك بأقل من مستواه.
الرابط ينتشر
رابط كوكل درايف يوصل لأي واحد، وما تعرف منو فتحه ولا منو نزّل الصور.
الصور قبل الفلوس
الزبون ياخذ الصور كاملة، وبعدها تبدي تلاحك على باقي المبلغ.
6 طبقات حماية لكل معرض
كل طبقة تشتغل تلقائياً. إنت بس تختار الإعدادات مرة وحدة وقت تسوي المشروع.
رابط خاص لكل زبون
كل معرض إله رابط فريد ما ينعرف ولا ينبحث عنه، ومحجوب عن محركات البحث.
رمز من 6 أرقام
الرمز يوصل للزبون برسالة منفصلة على الواتساب. الرابط لوحده ما يفتح شي.
حد للأجهزة من 1 إلى 5
تحدد كم جهاز يفتح المعرض. أي جهاز زايد ينرفض، وتوصلك عنه تنبيه.
سجل لكل دخول
تشوف منو فتح المعرض، ومتى، ومن أي جهاز، وكل محاولة انرفضت.
علامة مائية لحد الدفع
الصور تبين بالعلامة المائية، وتنشال بضغطة وحدة من تأكد إنه وصلك المبلغ.
حذف تلقائي
تختار عمر المعرض: 7 أيام، 14، 30 أو 60 يوم. بعدها ينحذف لحاله وما يبقى أثر.
الزبون يشوف ويختار، والتحميل بس بعد الدفع
بدل ما تلاحق الزبون على المبلغ، خلّي المعرض هو اللي يمسك الصور. الزبون يتصفح ويختار صوره للألبوم، وإنت تفتح التحميل من يوصلك حقك.
مو بس حماية. تجربة يحچي عنها زبونك
أدوات تخلّي التسليم أسرع إلك، وأحلى لزبونك وضيوفه، وكلها داخل نفس المعرض.
لاقي صورك بالسيلفي
بعرس بيه 2000 صورة، محد يقلّب صورة صورة. الزبون أو الضيف ياخذ سيلفي، وKAPTORI يطلعله بس الصور اللي هو بيها، بثواني.
- السيلفي ما تنحفظ ولا تنرفع، نقارن ملامح الوجه بس
- تحليل الوجوه يصير تلقائياً بعد ما ترفع الصور
- يشتغل بالمعرض الخاص وبرابط الضيوف
QR على طاولات القاعة
اطبع بطاقة بيها كود QR وحطها على الطاولات. الضيف يمسحها ويأخذ سيلفي، ويشوف صوره هو بس. باقي المعرض يبقى خاص بالعريس والعروس.
- بطاقة جاهزة للطباعة باسم المناسبة واستوديوك
- الضيف ما يحتاج رمز ولا تطبيق
- كل ضيف يصير إعلان إلك
تحميل الكل بضغطة
بعد الدفع، الزبون ينزّل الألبوم كامل بملف واحد مرتب حسب الألبومات، بدل صورة صورة.
هوية استوديوك
شعارك ولونك على شاشة الرمز وأعلى المعرض. الزبون يحس المعرض مالتك إنت.
حد لاختيار الألبوم
«اختار 40 صورة» ويبينله عداد. لا جدال على العدد بعد ما يختار.
ملاحظات على كل صورة
الزبون يكتب «فتّح الإضاءة» أو «شيل هذا الشخص»، وتوصلك الطلبات مرتبة بصفحة المشروع.
عرض شرائح بموسيقى
الصور تشتغل كعرض بشاشة كاملة، ووية موسيقى إنت تختارها للمناسبة.
تذكير قبل الحذف
قبل 3 أيام من حذف المعرض توصلك تنبيه، وبضغطة ترسل للزبون تذكير على الواتساب.
بسيط إلك، وأبسط لزبونك
تسوي المعرض بأقل من دقيقة، والزبون يفتحه من أي تلفون بدون ما ينزّل شي.
المصوّر إنت
- سوّي مشروع
اسم المناسبة، اسم الزبون ورقم تلفونه.
- اختار الحماية
عمر المعرض، عدد الأجهزة، التحميل، والعلامة المائية.
- ارفع الصور والفيديو
واضغط إرسال، والرمز يوصل للزبون برسالة منفصلة.
- تابع من لوحتك
حالة كل معرض، شنو اختار الزبون، ومنو حاول يدخل.
الزبون بدون تطبيق · بدون حساب
- يفتح الرابط
من الواتساب مباشرة، على أي تلفون أو كمبيوتر.
- يدخّل الرمز
6 أرقام وصلته برسالة، والمعرض ينفتح على جهازه.
- يتصفح ويختار
يأشّر بالقلب على صور الألبوم، أو يلاقي صوره بالسيلفي، ويكتب ملاحظاته عليها.
- يرسل اختياره
بضغطة وحدة، ويحمّل الألبوم كامل من تفتح إنت التحميل.
الفرق واضح
| الميزة | KAPTORI | واتساب / تليغرام | كوكل درايف |
|---|---|---|---|
| جودة عالية بدون ضغط الواتساب | ✓ | ✗ تنضغط | ✓ |
| رمز دخول منفصل | ✓ | ✗ | ✗ |
| حد لعدد الأجهزة | ✓ 1 إلى 5 | ✗ | ✗ |
| تعرف منو فتح | ✓ سجل كامل | ✗ | ✗ |
| التحميل بعد الدفع | ✓ | ✗ | ✗ |
| الزبون يختار صور الألبوم | ✓ | ✗ | ✗ |
| يلاقي صوره بالسيلفي | ✓ | ✗ | ✗ |
| QR لضيوف المناسبة | ✓ | ✗ | ✗ |
| شعار ولون استوديوك | ✓ | ✗ | ✗ |
| ينحذف تلقائياً | ✓ | ✗ | ✗ |
| واجهة عربية بالكامل | ✓ | ✓ | ✓ |
أسئلة تتكرر
هل الزبون يحتاج ينزّل تطبيق أو يسوي حساب؟
لا. يفتح الرابط من الواتساب، يدخّل الرمز، والمعرض ينفتح بالمتصفح على تلفونه مباشرة.
شنو يصير إذا الزبون دز الرابط لغيره؟
الرابط لوحده ما يفتح شي، يحتاج الرمز. وحتى لو انطى الرمز، المعرض يشتغل بس على عدد الأجهزة اللي إنت حددته، وأي جهاز زايد ينرفض وتوصلك عنه تنبيه.
هل الصور تنضغط وتخسر جودتها؟
لا. الزبون يحمّل الصور بجودة عالية، مو مثل الواتساب اللي يضغطها.
أگدر أرفع فيديو؟
إي، تگدر ترفع صور وفيديو بنفس المعرض.
شلون يشتغل البحث بالسيلفي؟ وهل السيلفي تنحفظ؟
بعد ما ترفع الصور، KAPTORI يحلل الوجوه بيها تلقائياً. الزبون أو الضيف ياخذ سيلفي، وتلفونه يحولها لملامح رقمية بس، والسيلفي نفسها ما تنرفع ولا تنحفظ. بعدها يطلعله الصور اللي بيها نفس الوجه.
شنو يشوف الضيف اللي يمسح الـ QR؟
يشوف بس الصور اللي هو بيها بعد ما ياخذ سيلفي. ما يگدر يتصفح باقي المعرض، والتحميل يمشي حسب الإعدادات اللي إنت مختارها.
أگدر أحط شعار استوديوي؟
إي، من صفحة «الاستوديو والباقة» ترفع شعارك وتختار لون الأزرار، ويطلعون للزبون بكل معرض ترسله.
بكم الاشتراك؟
KAPTORI هسه بالنسخة التجريبية، وتگدر تبدي مجاناً بمساحة 10 GB. وإذا تحتاج مساحة أكبر، أكو باقات 100 GB و500 GB.
وين تنحفظ الصور؟
الصور تنحفظ بمخزن سحابي خاص ومشفّر، ما ينفتح إلا من خلال المعرض، وتنحذف تلقائياً بعد المدة اللي تختارها.